Belarus-in 2022 Nobel Peace Prize dawngtu kum 10 tang turin hrem

Belarus court chuan an rama human rights advocate, 2022 Nobel Peace Prize dawngtu zinga mi, Ales Bialiatski chu kum 10 chhung lung-in tang turin a hrem.

Court chuan Bialiatski leh human rights group a din, Viasna Human Rights Centre-a hotu pathumte chu sorkar laka lungawi lohna lantirtute sum hmanga puia puhin thiam loh a chantir a ni.

Kum 60 mi, Bialiatski leh midang pathumte hi kum 2020-a President atana Alexander Lukashenko thlan nawn leh a nih chungchanga nawrh huaihawt vangin kum 2021 khan man an ni. Lukashenko hi kum 1994 aṭanga Belarus president ni tawhin, eptu lamte a rahbeh bakah independent news media thlengin a bitum niin an puh.

Kum 2020-a President duh lohna lantira nawrh huaihawt hian thla eng emaw zat a awh a, Belarus rama nawrh huaihawt lian ber niin, thuneitu lam pawh nuarte chungah hian an che na hle. Mi 35,000 chuang man niin, mi sang tel chuan police-te kut an tuar bawk.

Bialiatski hi nikum khan khawvela chawimawina ngaihhlut, Nobel Pece Prize chu Russian human rights organisation Memorial leh Ukraine human rights organisation Center for Cvil Liberties-te nen an dawng an ni.