Cambodia Court-in eptu hruaitu ram phatsantuah puhin thiam loh chantir

Cambodia-a Phnom Penh Municipal Court chuan an ram eptu pawl hruaitu, Kem Sokha chu ram phatsantu leh, sorkar laka hela puhin thiam loh a chantir a, kum 27 tang tura hremin house arrest-a dah a ni ang.

Kem Sokha hi party ṭhiah tawh, Cambodia National Rescue Party president a ni ṭhin. Court chuan Sokha hi prime minister Hun Sen kaihhruai sorkar paihthlak tuma ramdangte thawhpui leh phiarruah a puh a ni. Hun Sen hi khawvela ram hruaitu ni rei thei ber zinga mi niin, kum 1985 aṭang khan Cambodia ram hruaitu dinhmun hi a chelh tawh a ni.

Kum 69 mi, Kem Sokha hi kum 2013-a video a tihchhuah, US-a pro-democracy group thlawpna a dawn thu a sawi behchhanin, kum 2017 khan man a ni. Man a nih hnuah a party, Cambodia National Rescue Party pawh hi ṭhiah a ni zui a, party hruaitu dang eng emaw zat chu thubuai siamsak niin, ṭhenkhat chu ram dangah an tlanchhe zui bawk. Human rights group hrang hrang leh khawthlang ram sorkarte chuan Sokha man a ni leh, thubuai siamsak a nih dan chu demin, politics thil vang niin an puh.

Cambodia-a US ambassador W Patrick Murphuy chuan Sokha chunga dik lo taka rorel sak a ni tiin court thutlukna siam chu a sawisel. Sokha-a lawyer, Ang Udom pawhin an appeal tur thu a sawi bawk.

Hetih lai hian Cambodia court-te hi PM Hun Sen-a'n a thunun vek avangin court thutlukna pawh hi an rinlawk ang a nih thu mi tam takin an sawi. Kem Sokkha leh a party hi an ram mipuiteah an tla na chho a, Hun Sen leh a party paihthla thei tura an chak chhoh zel a rinawm avangin sorkar lamin a bitum ta nia sawi a ni. Human Rights Watch Asia deputy director, Phil Robertson chuan Kem Sokha hremna hi a political party tihchhiatsakna ringawt ni loin, kumin July thlaa inthlanpui neih tura mipuite beiseina tihchhiatna a ni tel nghal a ni, a ti.