China-in defence budget 7.2% in a tipung

China chuan nimin khan national budget 2023 a tichhuak a, defence budget chu 7.2%-a tisangin, yuan trillion 1.55 (USD tld 224) a dah.

China defence budget atana USD tld 200 chuang dah a nih kum thumna tur a ni. Kum 2021 khan a ṭum khatna atan USD tld 200 chuang hi dah a ni. Kumin defence budget a tihpun leh hian a ṭhenawm ramte bakah khawthlang ram, a bikin US ngaihven a hlawh nghal hle.

State media-te chuan defence budget tihpun hi khawvel huapa security dinhmun thlirin, ram dangten an sipaite an thuam chak chhoh dan ngaihtuahin thil tihawm tak a ni tih an sawi. Hetih lai hian expert ṭhenkhat chuan official-a an puanchhuah aiin, defence budget atana an dah hi a la tam zawk hle an ring.

China sorkar chuan an GDP aṭangin defence tana sum dah hi a percentage a la hniam hle a, ṭhenkhatin sawisel an tum lui mai niin a sawi.

Kum 2023 atana China defence budget siam hi US defence budget hmun lia ṭhena hmun khat vel chauh a la ni pha thung. US hian 2023 fiscal-a defence budget atan USD tld 858 a dah a, hei hian sipaite thuam chakna tur bakah ralthuam, lawng leh aircraft leina tur te, Taiwan leh Ukraine puihna turte a huam tel thung.

China hian US nena an thil neih inthlau lutuk chu siamṭhat a ngai tih a lo sawi fo tawh a, China hian aircraft carrier pathum a neih laiin US hian 11 a nei thung. Hei vang hian defence budget a tihpun hmangin, China hian ralthuam leh sipaite thuam chak chhoh a tum a ni.