Greece PM-in rel chesuala thi chhungte hnenah ngaihdam dil

Greece prime minister Kyriakos Mitsotakis chuan nimina an ram mipuite tana thuchhuah a tichhuahah, kar liam ta Thawhlehnia rel insu vanga thi chhungte hnenah ngaihdam a dil.

February 28-a Greece ram laili, Larrisa station bula khualzin phur leh bungraw phur rel insu vanga thi mi 57 an tling tawh a ni. He chetsualna hi Greece rama rel chetsualna thleng rapthlak ber nia sawi a ni.

PM Mitsotakis chuan, ral pahnih, hmun hran ve ve a kal turte hi kawng inanga an tlan tur a ni lo a, hei hi tumahin an lo ngaihtuah lo a ni tiin, he thil thleng vang hian Prime Minister a nih angin an ram mipui, a bikin chetsualna thleng vanga thi chhungte hnenah ngaihdam a dil tak meuh tih a sawi.

Chetsualna thleng chungchangah thuneitu lam sawiselna pawh a nasa hle. Larissa station master pawh man a ni tawh a, nimin khan court-ah hruai niin, a hna ngaihthaha puh chungchangah thubuai siamsiak a nih rin a ni. Zirlai leh rail worker-te chuan lungawi lohna lantirin rally huaihawt an tum.

Rel chesuala thite sunna hi nimin khan Athens bakah khawpui dangah pawh neih a ni.

Khualzin phur relah hian mi 350 an chuang a, an zinga 10 chu thawktu an ni. Bungraw phur relah hian mi pahnih an chuang bawk.

Khualzin phur rel hian an ram huna Thawhlehni zan dar 7:30 vel khan Athens a chhuahsan a, zanlai rik hma hretah tunnel aṭanga a tlanchhuak chu Larissa khaw bul, Vale of Temple thlen hma lawkin an tlanna kawng vek rawn zawh bungraw phur rel rawn tlan nen hian an insu a ni. An insu na hle a, rel pindan hma lamte chu a chhe hneh hle.