Bangladesh-a Rohingya refugee Camp-ah kangmei chhuak

Khawvela refugee camp lian ber, Bangladesh-a Rohingya refugee camp-ah Pathianni khan kangmei nasa tak a chhuak a, chenna in 2,000 vel a kangral.

Bangladesh thuneitute chuan kangmei chhuakah hian thi leh hliam an awm lo niin an sawi. Raltlante khawsakna in hi mau leh tarpaulin hmanga sakte an nih avangin kangmei hian a mankai chak hle a, mi 12,000 vel chu chenna in nei loin an awm phah a ni.

Police-te chuan kangmei hi Camp 11 aṭanga chhuak niin tihluih nge, tihpalh thila thleng tih an chhui mek a, mi pakhat chu thu zawhfiah turin an hreng mek a ni.

Kangmei chhuah hun hi an ram huna chawhnu dar 2:45 vel niin, darkar thum hnuah an ṭhelh mit thei chauh a ni. Raltlante chenna tam tak a kanral bakah, mosque 35 leh learning centre 21 a kang tel bawk.

Cox's Bazar area-a refugee camp-a awm zinga a tam ber hi Myanmar ram aṭanga raltlan, Rohingya te an ni. He camp-ah hian raltlan maktaduai 1 dawn an khawsa a ni. Tun hma pawhin camp-ah hian kangmei a lo chhuak fo tawh a, kum 2021 January leh December, 2022 inkar khan Rohingya camp-ah hian ṭum 222 zet kangmei a chhuak a, heng zinga 60 chu mi ṭhenkhatin an hal luih a ni tih Bangladesh defence ministry report chuan a tarlang.

Kum 2021, March thla khan Rohingya camp-a kangmei chhuak vangin mi 15 an thi a, chenna hmun 10,000 kangralin mi 50,000 vel chu hmun dangah sawn an lo ngaih phah tawh bawk a ni.