Afghanistan University-ah hmeichhiate kal la phal lo

Afghanistan univer­sity-te chu thlasik chawlh an neih hnuah nimin aṭang khan hawn ṭan a ni leh ta a, mahse Taliban sorkar chuan hmeichhe zirlaite chu an kal a la khap chhunzawm zel.

Kum 2021, August thlaa Taliban-ten Aghanistan-a thuneihna an chelh hnu­ah, hmeichhiate khuah­khirhna hrang hrang an siam chho leh a, higher education zirlai hmei­chhiate chu an zirna chhunzawm a khapsak a ni. Hei hi Muslim ram hrang hrangte pawhin an sawisel fo a ni.

Taliban official-te chuan hmeichhiate lehkha zir an khapsak chu hun rei lote chhung chauh tur a nih thu leh, ruahmanna thar siam leh thuai a nih tur thu sawi mah se, tun thlengin higher secondary chin chu hmeichhiate an kal a la khap chhunzawm reng a ni. Hmeichhiate zirna a khapsak chungchanga hian chhuanlam hrang hrang a siam a, fund a awm loh vang te, Islamic rinna zulzuia syllabus siamṭhat a ngaih thute a sawi.

Zirna lamah chauh lo pawh hmeichhiate khuahkhirhna hrang hrang an siam a, sorkar hnathawk hmeichhia tam zawk chu ban an ni tawh a, an laichin mipate tel loa park, gym leh vantlang punkhawmna hmuna kal leh zinchhuahte an khap an ni.

Afghanistan-a Taliban sorkar hi eng ram mahin official-in an pawm thu an la sawi lo.