Kim-a farnu Kim Yo Jong-i'n US leh S Korea a vau

North Korea ram hotu, Kim Jong-un-a farnu, Kim Yo Jong chuan nimin khan United States leh South Korea vauin, ram pahnihte lakah a ṭul anga chhan letna pe turin an ram chu a inpeih reng tih a sawi.

US leh SKorea sipaite hian tun hnaiah joint military drill an nei fo a, tun thla tawp lamah hian joint exercise lian ber neih tumin an inbuatsaih mek bawk. Joint exercise an neih ṭhin hi NKorea ram chuan a ngaimawh hle a, vawi tam tak a lo sawisel tawh a ni.

Thawhṭanni khan Korean Peninsula-ah US chuan nuclear ralthuam phur thei, B-52 bomber a thlawh tir a, hei vang hian Kim Yo Jong chuan thuchhuah hi a rawn siam ve nghal a, eng anga hma lak nge an tum erawh a sawilang lo. Mahse NKorea hian US-SKorea military drill neih ṭhin hi an ram beihna tura an inbuatsaihna angah a puh ṭhin avangin, a hma pawhin drill an neih lai hian missile a lo enchhin fo ṭhin a ni.

Kim Yo Jong chuan, " US leh a duh duha a thunun theih, South Korea sipaite chettlat dan chu uluk takin kan lo thlir reng a, a ṭul anga rang taka che chhuak turin kan inralring reng a ni," tiin a thuchhuahah hian a tarlang.

February thla khan Kim Yo Jong hian Pacific chu North Korea tana firing range-a siamah a lo vau tawh bawk. An missile enchhinte kahthlak sak an nih chuan, indo puanna angah an ngai dawn tihte pawh a sawi a ni.

Kim Yo Jong hi a nuṭa, Kim Jong-un rorelna hnuaiah dinhmun pawimawh tak chelh mekin a nuṭapa thlak thei tura mi tam tak rin a ni. Rorellai, Workers' Party of Korea (WPK)-a publicity and information department-ah deputy department director niin, kum 2021 September thla aṭang khan State Affairs Commission of North Korea-ah member atan ruat a ni bawk a, he panel-a hmeichhe awmchhun a ni.