Pakistan-in PM hlui Imran Khan thusawi tihchhuah khap

Pakistan Electronic Media Regulatory Authority (PEMRA) chuan an ram prime minister hlui, Imran Khan thusawi chu electronic media-ah tihchhuah a khap.

Khapna thupek hi Pathianni khan tichhuakin, Thawhṭanni aṭang khan hman ṭan a ni. He khapna hian Imran Khan-a thusawi record leh live speech a huam vek a ni.

Nikum April thlaa no-confidence vote hmanga Pakistan prime minister a nihna aṭanga paihthlak, Pakistan Tehreek-i-Insaf (PTI) hotu Imran Khan hian paihthlak a nih hnuah PM Nawaz Sharif leh a kaihhruai sorkar bakah, an ram sipaite chu na takin a bei zui reng a ni. Sorkar beihna a tihchhuah fo hnuah he khapna thupek hi siam a ni zui ta a ni.

Media regulator chuan Khan hian sorkar thuneitute leh institution-te chu thu belhchian dawl lo leh awmze nei lo hmanga a beih chhunzawm reng avangin a thusawi tihchhuah khapna hi a siam a ni tih a tarlang. Khan chuan ram chhung dan leh thupek tichhe thei turin, mipuite rilrua state institution leh officer-te huatna tuh tumin thu a sawi a ni, a ti. He khapna thupek zawm lo a, Imran Khan-a thusawi tichhuak luite chu an license hlih sak an ni dawn tih a sawi bawk.

Hetih lai hian PTI chuan khapna thupek tihchhuah hi an pawm ve lo tih sawiin, an party hotu Fawad Chaudhry chuan he thil hi provincial pahniha assembly inthlan lo awm turah, sorkar chuan PTI an chak a hlauhzia a lantirna mai a ni, a ti.

PEMRA hian nikum November thla khan Khan-a thusawi leh, press conference-a neihte chu television channel-a tihchhuah a lo khap tawh bawk. Mahse sawiselna a nasat avangin sorkar laipui chuan khapna thupek hi tihchhuah a nih ni vek hian a sut leh nghal a ni.