Thla 2 chhungin China ramah lut leh chhuak mtd 40 dawn awm
China ramin Covid-19 khuahkhirhna hrang hrangte a hlihfel hnuah, January 8 - March 7 chhungin an ramah khualzin lut leh chhuak maktaduai 39.72 an awm hman. Nikum hemi hun lai aiin an punna hi 112.4% a tling a ni.
National Immigration Administration chuan Thawhlehni khan data tichhuakin, kumin March 7 thleng khan ram dang mite tan visa leh residence permit 1,22,000 an pe chhuak tih sawiin, nikum aia a punna hi 33.1% a tling tih a tarlang.
China sorkarin Covid-19 hri leng vanga zin veivahna kawnga khuahkhirhna a siamte hlip a, ramri a hawn vek hnuah an ram mipui ngei pawh ramchhungah an zinkual nasa hle. Hei bakah January thla tawp lama Lunar New Year an hman chuan khualzin a hip hnem hle bawk.
February 25 bik khan China ramah khualzin lut leh chhuak maktaduai 1.013 an awm a, he hi kum 2020 hnuah ni khatah an tam ber ṭum a ni.
China rama Covid-19 hri rawn leng thar leh chuan ziaawm lam a pan zel a, hri vanga damdawi-ina dah luh ngai leh thi pawh an tlahniam zel a ni. Hei vang hian US pawhin China ram aṭanga lut turte Covid negative report nei tura a phutna chu a titawp tawh dawn tih a sawi. Japan pawhin kar liam ta khan China aṭanga lutte Covid test neih a phutna chu a lo titawp tawh bawk.