Afghanistan : Women's Day-ah hmeichhiate'n lungawi lohna lantir

Afghanistan khawpui Kabul-ah nimin, International Women's Day khan hmeichhe ṭhenkhatten Taliban sorkar laka lungawi lohna lantirin, Afghan mite venghim turin khawvel an ngen.

Taliban-ten Afghanistan-a thuneihna an chan hnuah hmeichhiate dinhmun a chep chho hle a, United Nations chuan Taliban sorkar hnuaia Afghanistan chu khawvela hmeichhiate dikna chanvo rahbehsak nasatna ber ram a ni, tiin a sawi. Thuneitute chuan hmeichhiate chu an zalenna laksakin, inah an awmtir tlat a ni, a ti.

Kum 2021, August thlaa thuneihna an chan aṭangin, Taliban sorkar hian hmeichhiate khuahkhirhna a siam belh zel. Secondary leh higher education-ah hmeichhiate kal a khap a, sorkar hnathawk hmeichhia tam tak ban tawhin, hlawh tlemte pein ina awm turin a ti bawk. Hei bakah hian park, funfair, gym leh public bath-ahte kal khap a ni a, pawn an chhuahin an taksa pum khuhna, burqa hmang tura tih an nih bakah, an laichin mipa tel loin zinchhuah an khap bawk.

Hmeichhia khuahkhirhna khauh tak siam a nih rualin, mi ṭhenkhat chuan man leh kutthlak hial inhuamin Taliban sorkar laka lungawi lohna hi an lantir ṭhin a, mahse thuneitute chuan an hnawtdarh zel a ni. Nimina nawrh huaihawt zinga pakhat chuan Afghan mipuite chungchangah UN chuan thutlukna pawimawh a siam a hun tawh a ni, a ti.