Latvia-in driver zurui khalh motor an mansakte Ukraine tan pe

Latvia ram chuan driver zurui khalh motor an mansakte chu Ukraine rama sipaite leh hospital-te hman turin a thawn zel dawn.

Kumin chhungin zurui khalh motor an man hi car 200 chuang a ni tawh. Driver blood alcohol level 0.15% chin chunglam motor an mansak ṭhin a ni. Nilaini khan an motor hman zinga car pasarih chu Ukraine-ah thawn a ni.

Sorkarin an motor man Ukraine-a thawn dan tur buaipui tura a ruat, NGO group Twitter Convoy hotu chuan zurui chunga motor khalh chu a khalhtu bakah mipuite tana a hlauhawmzia hriatchian a ngai a ni, a ti. Sorkar chuan Ukraine-a thawn tur hian an motor man zingah dozen hnih chu kar tin an kutah hlan a tum tih a sawi bawk.

"Rui chunga motor khalh hi heti zat hi an man ang tih tumahin an ring lo zawk ang. An motor mante hi hralh leh zung zung a harsa a, hei vang hian Ukraine-in an mamawh an lo hman tura thawn turin ngaihdan hi ka nei ta a ni," tiin motor an man zingah pakhat chuan Russia flag a intar thu a sawi.

Nikum February 24-a Russia-in Ukraine ram a run hnuah khan, Twitter Convoy hian Ukraine tana donation khawnin, an sum hmuh aṭang hian Ukraine ramah motor 12,000 vel an thawn tawh a ni.

Latvia finance minister Arvils Aseraden chuan NGO hmalakna hian sorkar pawh a hneh hle tih sawiin, hei vang hian motor an mante pawh Ukraine rama thawn tur hian an rel ta tih a sawi. Ukraine mipuite puihna tur chuan a theih anga hmalak an inpeih reng thu a sawi bawk.