US-in Bangladesh leh Myanmar chhawmdawlna a pe dawn
US State Department chuan Bangaldesh-a Rohingya refugee leh, Myanmar tualchhung buaina thleng mek tuarte chhawmdawlna turin USD maktaduai 26 a pe dawn tih a puang.
Chhawmdawlna a pek tur a puan thar lehte nen, US hian kum 2017, August thlaa Myanmar aṭanga Bangladesh-a Rohingya raltlante ṭanpuina tura a sumpek hi USD tld 2.1 a tling chho tawh dawn a tih Nilainia 2023 Joint Response Plan for the Rohingya Humanitarian Crisis a hawnnaah US secretary of state Antony Blinken chuan a sawi.
State department thuchhuah chuan, chhawmdawlna sum pek tur zinga USD mtd 24 chu Bangladesh-a Rohingya raltlante tan bik niin, hemi hmang hian raltlan 9,80,000 vel chu puih an ni ang.
Blinken chuan ṭanpuina sum hi naupang leh ṭhalaite hnenah zirna leh vocational training pekna atan te, ei tur leh tui thianghlim pekna atan te, hri leng tur venna atan, sanitation system thuam ṭhatna atan te, chhiatna thleng thei laka invenna tura inbuatsaihna atante hman a ni ang, a ti.
US chuan Myanmar tualchhung buaina thleng mekin a nghawng leh tuarte ṭanpui leh chhawmdawlna tam zawk pe turin donor dangte pawh a ngen nghal bawk a ni.