WHO-in chi inthliarna kalpuia puh Asia-a an director a ban

World Health Organization (WHO) chuan Western Pacific-a an top official, Dr Takshi Kasai chu state member eng emaw zatin chi inthliarna nasa tak kalpui leh, ṭawngkam leh nungchang mawi lo tak neia an puh avangin a hna aṭangin a ban.

WHO director-general Tedros Adhanom Ghebreyesus chuan Western Pacific-a an regional director puhna hrang hrangte hi chhui chian a nih hnuah, a chetdan a dik lo tih hmuhchhuah a nih avangin a hna aṭangin ban nghal a ni tih Nilaini khan a sawi. WHO chanchina regional director ban a nih ṭum khatna a ni.

Dr Taksahi Kasai hian staff-te laka chi inthliarna ṭawngkam mawi lo tak tak te a hman fo avangin, nikum chhung khan staff zinga 30 chuang chuan WHO senior leader leh executive board member-te hnenah complaint an lo thehlut tawh a ni. Heng complaint-te hi pawl chhung aṭangin chhui a ni a, chhui a nih chhung hian Kasai hi chawlh lailawk tir a ni a, senior official dangin a hna hi an lo kep a ni. Chhuina report thehluh a nih hnuah a hna aṭangin ban a ni zui ta a ni. A thlaktu tur hi thla thar aṭangin buaipui ṭan a ni ang a, October thlaah inthlan neih a ni dawn tih Tedros chuan a sawi nghal bawk.