Iran-in Russia aṭangin Su-35 fighter jet lei dawn

Iran state media chuan Iran sorkar chuan Russia aṭanga Su-35 fighter jet leina turin inremna a siampui tih a sawi.

Broadcaster IRIB chuan eng ang inremna nge an siam a sawilang lo a, mahse fighter jet leina tur contract erawh Iran sorkar chuan a tifel tawh a ni, a ti. Iran hian ram dang ṭhenkhat hnen aṭanga military aircracft lei dan tur pawh a buaipui mek niin a tarlang bawk.

Russia-in Ukraine a run avanga khawthlang ramten an hrek mek karah, Russia leh Iran hian inlaichinna nghet zawk an siam mek nia sawi a ni. Nikum July thla khan Russia president Vladimir Putin leh Iran supreme leader Ayatollah Ali Khamenei-te chu Iran-ah an inhmu a ni.

Ukraine ram a beihnaah Russia hian Iran siam drone-te a hmang nia puh a ni. Iran chuan Russia ramah hian drone an thawnlut ngei a, mahse hengte hi Ukraine ram a run hma daih thil niin a sawi thung. Russia pawhin Ukraine-ah Iran siam drone hi a hmang tel lo niin a sawi a, mahse an drone hman kahthlak sakte chu Iran siam an ni tih Ukraine lam chuan an sawi thung.