Israel-ah nawrh lian-tham tak huaihawt leh

Israel mipui sing tel chuan kartawp, Inrinni liam ta khan sorkarin judicial system thlak a tumna duh lohna lantirin nawrh huaihawt liantham tak an buatsaih leh.

Nawrh huaihawtte chuan Inrinni liamtaa nawrh an buastaih an ram chanchina sorkar laka lungawi lohna lantira mipui punkhawmna tam ber a ni tih an sawi. Khawpui hrang hrangah punkhawmna hmuna tel chu mi nuai 5 vel niin, Tel Aviv bikah mi nuai 2 vel an pungkhawm niin an sawi a ni. Mahse media lam chuan khawpui hrang hranga pungkhawmte hi an vaiin nuai 2.5 - nuai 3 vel niin an sawi thung.

Prime minister Benjamin Netanyahu chuan judicial system siamṭhat a, court thuneihna hrek theihna tura siam chu sorkar hnuaia branch hrang hrangte tana thuneihna rualkhai taka semna tur a ni tih a sawi. Mahse a duh lotu lam chuan sorkar thiltih tum chu an ram democracy dinhmun tiderthawng thei niin an sawi thung.

Judicial system siam danglam tumnaah hian, Supreme Court-in thutlukna a lo siam tawh chu, member 120 awmna Parliament chuan simple majority vote hmangin a hnawlsak thei dawn a ni. He dan thar hnuaiah hian Prime Minister leh a thawhpuite kuta thuneihna sang tak pek a ni dawn a, hei hian dan lama rorelna thlengin a nghawng dawn tih eptute chuan an sawi a ni.

Inrinnia Tel Aviv-a nawrh huaihawtnaah eptu hruaitu, Yair Lapid chuan thu sawiin, Israel ram tana chhiatna nasa ber tur a ni, a ti.

Israel sorkarin an ram judicial system siamṭhat a, Supreme Court thuneihna tinep a, Parliament member-te thuneihna sang zawk pek a tum hi duh lohin, hun rei tak chhung chu kartawp apiangin mipuiten lungawi lohna an lantir tawh a ni. Mahse sorkar chuan a dinna a tinghet tlat a, nawrh huaihawt ṭhin pawh politics lama an eptu pawlten mipuite an fuih vang niin a puh.

Judicial system thlakna tur bill hi Parliament-ah reading vawi thum a paltlang hnuah pass-in, law-ah chantir a ni ang. Parliament hian reading vawi khatna a paltlang tawh a ni.