Ralthuam lakluh tam lamah Ukraine pathumna
Think tank Stockholm International Peace Research Institute (SIPRI)-in nimina report a tihchhuahah, nikum Russia-in a run hnuah Ukraine ram chu khawvelah ralthuam lakluh tam lamah a sang pathumna a ni, a ti.
SIPRI chuan Russia ram nena inep mek karah, Europe ram hrang hrangte ralthuam lian lakluh a pung chho hle tih a sawi. Kum 2018-2022 chhunga Europe ramte ralthuam lakluh chu 47% in a pung tih a tarlang. NATO ram bikte ralthuam lakluh punna chu 65% a tling pha bawk.
Hetih lai hian khawvel pum huapah chuan ralthuam lei hi 5.1% in a tlahniam thung. SIPRI Arms Transfers Progrmame-a senior researcher Pieter D Wezeman chuan, "Khawvel huapin ralthuam lakluh hi tlahniam mah se, Russia-in Ukraine a run hnuah Europe ramte erawh chuan ralthuam tam zawk neih an duh a ni," a ti.
NATO ram zinga ralthuam supply-tu liante chu US, France leh South Korea-te an ni a, nikum chhunga Ukraine-a ralthuam tam ber petute chu US, Poland, Germany leh UK an ni bawk.
Hetih lai hian Ukraine hnena ralthuam thawnlut tam ber hi an neih sa, second-hand a ni hlawm. US-in ralthuam a thawnluh zingah hian artillery piece 228 leh guided artillery rocket 5,000, Poland aṭangin tank 280 leh UK aṭangin anti-tank missile 7,000 chuang a tel tih SIPRI chuan a sawi.
US hian nikum chhung khan Ukraine tan ralthuam ṭhahnem tak thawn mah se, ram dang pali - Kuwait, Saudi Arabia, Qatar leh Japan-a a thawn aiin a la tlem zawk tih SIPRI chuan a tarlang bawk. US hi khawvel pumah ralthuam thawnchhuak tam ber niin, khawvel huapa ralthuam thawnchhuah aṭanga US in a thawnchhuah hi kum nga chhungin 33% aṭangin 40% ah a kai chho tawh bawk.