Khawvela refugee camp lian ber, Bangladesh-a Cox Bazaar camp-a kar liam taa kangmei nasa tak chhuak chu ruahman lawk leh hal luih a ni tih investigator-te chuan an sawi. 
March 5-a Rohingya camp-a kangmei chhuakah hian chenna in 2,800 kangralin, mi 15,000 chu chenna nei loin an awm phah a ni. 
Bangladesh sorkarin kangmei chhuah dan chhui tur hian member pasarih awmna panel a din a, panel chuan helpawl hal ni ngeiin an sawi. Investigation team hotu Abu Safian chuan, "Hmun hrang hrangah a rualin kangmei hi a chhuak a, hei vang hian he thil hi ruahman lawk vek a ni," a ti. Kangmei chhuak vang hian thi an awm lo a, mahse structure tam tak - school, medical clinic leh service point-te a kangral a ni. 
Panel hian Pathianni khan kangmei chhuah lai mita hmutu mi 150-te an kawm a, he pawikhawihna thlentu helpawlte chu chhui chhuah ngei an duh tih an sawi bawk. Panel chuan camp chhungah hian fire service hran siam rawtin, tui dahkhawlna hmun siam a ṭul thu te, camp chhunga chengte'n kangmei chhuah awlsamna thilte an hman tlem a ngaih thute an sawi bawk. 
Rohingya camp-ah hian kangmei a chhuak fo a, kum 2021 March thla khan kangmei nasa tak chhuakah refugee 15 kanghlumin, chenna in 10,000 chuang a lo kangral tawh a ni.