Kum upa lam an pun zel avangin China-in pension kum tihpun a tum

China sorkar chuan an ramah kum upa lam an pun chhoh zel avangin, pension kum tihpun a tum tih Ministry of Human Resources-a senior expert-in a sawi tih Global Times chuan a tarlang.

Sorkar chuan pension kum tihpun a nih tur thu hi official chuan a la sawi lo a, zirchiannate an nei phawt dawn nia sawi a ni. China hi khawvela pension kum tihhniamna ber ram zingah a tel a, mipa tan kum 60, office-a thawk hmeichhiate tan kum 55 leh factory-a thawkte tan pension kum hi kum 50-ah bithliah a ni.

China hian kum 2018-2015 inkar khan fa pakhat chauh neih phalna, one-child policy khauh taka a kalpui avangin an punna a tlem a, hetih lai hian kum upa lam erawh an pung chho nasa hle thung. Pension budget pawh a sang chho zel a, an harsatna chinfel dan tur hi policymaker-te chuan an buaipui mek a ni.

National Health Commission chuan an rama mi tluklehdingawn 1.4 zingah kum 60 chunglam matkaduai 280 awm mek chu kum 2035-ah maktaduai 400 chuangah a pung chho dawn tih a chhut a, hei hi Britain leh US ram pahniha mipuite awm zat belhkhawm nen an intluk vel ang.

China ram mipuite dam chin hi chawhrualin kum 1960-ah kum 44 a nih laiin, kum 2021-ah chuam kum 78 a ni tawh a, US ai pawhin a sang zawk a ni. Kum 2050-ah chuan mihring dam chin hi chawhrualin kum 80 a tling chhoh tawh rin a ni bawk.

Economist-te chuan an ramah hnathawk rual, active workforce tlahniamin kum upa lam an pung zel a, hei hian pension system an hman mek pawh a nghawng tawh a, siam ṭhat thuai a ngai tawh tih an sawi. China rama province 11 chuan pension budget hi an indaih loh chho mek tawh tih finance ministry chuan a tarlang. China Academy of Sciences chuan pension kum hi siamṭhat a nih loh chuan kum 2035-ah pension system hian sum a nei tawh dawn lo tih a sawi.