NKorea-in ni 3 chhungin missile vawi 2 a kapchhuak

South Korea leh United States-in joint military exercise lian tham tak an neih mek karah, North Korea chuan ni thum chhungin short-range ballistic missile vawi hnih a enchhin hman.

Pathianni tlai khan NKorea chuan missile hi a kapchhuak a, nimin zing khan a kapchhuak leh bawk tih South Korea joint chiefs of staff (JCS) chuan a sawi.

Hetih lai hian SKorea leh US chuan large-scale military exercise, 'Freedom Shield' chu Thawhṭanni aṭang khan an nei ṭan a, March 23 thleng a awh ang. Joint drill an neih tur hi a hma aṭangin NKorea chuan a lo ngaimawh sa hle a, tun thla tir lam khan NKorea hotu Kim Jong-un chuan drill neih tur hi dang tura sipaite chahin, a ṭul a nih chuan indo pawh hmachhawn tura inpeih turin a lo hrilh tawh bawk.

NKorea hian nikum khan missile 70 chuang a enchhin a, heng zingah hian US ram laili pawh kap pha tur interncontinental ballistic missile-te pawh a tel. NKorea-in missile a kahchhuah fo hnuah, SKorea leh US hian military drill an neih pawh hi an tilian ve zel a ni.