Pakistan police-te chuan nimin khan an ram prime minister hlui, Imran Khan chu eirua puhna thubuai kaihhnawihah man tumin Lahore-a a chenna inah an kal a, mahse Khan-a thlawptute chuan police-te hi lo dangin an innawr buai zui a ni. 
Police-te lo dang tur hian Pakistan Tehreek-e-Insaf (PTI) hotu, Imran Khan-a chenna in bulah hian PTI worker tam tak pung­khawmin, tiang leh hmanraw dangte an keng a ni. Police-te chuan PTI worker-te hnawh­darh nan hian tear gas leh water cannon-te an phuh a, anni hian lungin police-te hi an lo tawng let bawk a, a lehlam lehlamah hliam tuar eng emaw zat an awm a ni. Hliam zingah hian police team kaihruaitu, Islamabad DG (operations) Shahzad Bukhari pawh a tel. 
Kum 70 mi, Imran Khan hi ramdang palaite nen dan loa a thilpek dawnte dan lo vekah hralha puh a ni a, kar liam ta khan anti-corruption court-ah PM hlui lakah hian a thiltih avang hian Tosahkhana case ziahluh a ni. Court-a inlan tura kohna chu Khan hian an zawm loh avangin, manna tur thupek an tichhuak a ni. 'Toshakhana' hi treasure house tihna a ni a, politician-te chuan official-a thilpek an dawnte chu a hlutna aṭanga chhuta percentage eng emaw zat chu sorkara pein, an thilpek dawn hi an kawlzui thei a ni. Mahse Imran Khan chuan a thilpek dawnte hi hralhin, a hralhna hi a mimal kutah a lut vek nia puh a ni. 
Imran Khan hian a hmain video message tichhuakin, amah thlawptute chu lungawi lohna lantira chhuakkhawm turin a chah a ni. "Min man hnuah kan ram chu a mutthlu zui mai mai turah an ngai a, an dik lo tih in rawn lantir a ngai a ni," a ti. "Ka chungah eng thil pawh a lo thlen a, jail-ah dah emaw, thah emaw hial ka nih pawhin, Imran Khan tel lo pawhin in bei zui zel thei tih inlantir a, heng rukrute sala in awm mai tur hi in pawm tur a ni lo," tiin a fuih a ni.