Japan Parliament-in YouTuber MP Yoshikazu hnawtchhuak

Celebrity gossip YouTuber, Japan Parliament member ni bawk Yoshikazu Higashitani chu Parliament session-ah vawi khat mah a inlan loh avangin hnawhchhuah a ni.

Kum 2022, July thlaa MP atana thlan, kum 51 mi Higashitani hi thlan tlin a nih aṭang hian Parliament upper house, House of Councillor-ah a la inlan miah lo. Hetih lai hian House-a rorelnaah lawmaker-te hi inlan ngei tura tih an ni thung. Hei vang hian Thawhlehni khan House chuan Parliament aṭanga hnawhchhuah relin, nimin khan official-in thu­chhuah an siam zui a ni. Kum 1951 hnua Japan Parliament member hnawhchhuah hmasa ber a ni.

Hetih lai hian Higashitani, a online hming GaaSyy hi Dubai-ah a awm mek nia sawi a ni. A YouTube kaltlanga thu dik lo thehdarh leh, an hmingtichhiaah celebrity-ten an puh avangin, Japan-ah a kir chuan man a hlau a, hei vang hian Dubai-ah khawsain Parliament session pawh hi a tel duh lo niin local media-te chuan an tarlang.

Kar liam ta khan Parliament chuan Higashitani hi Tokyo-ah kir a, hmaichhan ngeiin Chamber-ah thupha chawi turin an ti a, mahse a inlan duh ta chuang lo a ni.