Myanmar team-in Bangladesh-a Rohingya refugee camp an tlawh

Myanmar team chuan Bangladesh-a Rohingya raltlante hruai kir lehna tur, Rohingya repatriation project kalpuina turin Cox's Bazar-a refugee camp an tlawh.

Myanmar team-ah hian immigration department mi leh sa 17 an awm a, Rakhin state-a social welfare minister Aung Myo-a'n a ho a ni.

Kum 2017-a Myanmar sipaiten Rakhine state-a beihpui an thlak avanga Bangladesh rama tlanchhia, Rohingya Muslim hi maktaduai dawn chu refugee camp hrang hrangah a la khawsa mek a ni.

Bangladesh leh Myanmar hian Rohingya raltlante hruai kir lehna tur hian kum 2018 khan inremna an lo siam tawh a, mahse Myanmar sipai sorkar chuan hma a la chak lo hle thung. Kum 2019-ah China palaina hnuaiah hma lak chhoh leh a ni a, mahse kum 2021-a Myanmar sipaiten an rama civil sorkar an paihthlak hnu khan hmalakna hi an chawlhsan zui leh a ni. Tunah hian hma lar thar leh an tum a, mahse eng hunah nge raltlan tam ber hi an kir leh theih dawn tih pawh an la chian loh thu Bangladesh official-te chuan an sawi.

Ram pahnihten inremna an siam tawh angin, pilot project hnuaiah raltlan zingah 1,140 chu hruai kir phawt tura tih niin, heng zinga mi 711-te chungchang chu tihfel tawh a ni. Midang 429-te case pawh buaipui leh mek a ni. An hruai kir tur tih zinga mite chu Myanmar palaite hian kawmin, an enfiah nghal bawk.

Rohingya raltlante hi refugee camp-ah hian mau leh plastic sheet-a sak inah an khawsa hlawm a, an dinhmun pawh a ṭha lo hle. Camp-ah pawh kangmeite a chhuak fo a, tun thla tir lam khan camp chhunga kangmei chhuak vangin mi 12,000 vel chu chenna in nei loin an awm phah a ni. Hna thawh tur te, lehkha zir chhunzawmna turte a awm ṭha lo a, camp chhungah pawikhawihna pawh a thleng fo bawk. Heti chung hian Myanmar-a sipai rorelna hnuaia kir leh chu an tan a him lo nia ngaiin, an zingah kir duh lo eng emaw zat an awm mek bawk.

Bangladesh sorkar chuan an rama Rohingya raltlan awm, mi 8,62,000 list chu Myanmar sorkar kutah a hlan tawh a, Myanmar chuan an zinga 70,000 vel chu an hruai kir dawn tih a sawi.