Brazil President hlui Bolsonaro hnenah a thilpek dawn thehlut turin hriattir

Brazil court chuan an ram president hlui, Jair Bolsonaro chu President a nih laia Saudi Arabia sorkar hnen aṭanga thilpek a dawn chu sorkar kutah thehlut turin a hriattir.

Court chuan Saudi Arabia-in tlereuh man to tak a pek leh, kum 2019-a United Arab Emirate aṭanga silai pahnih a dawn chu sorkar hnenah pe turin Bolsonaro hi Nilaini khan a hriattir a, ni nga hun a pek a ni. Hengte bakah hian kum 2019-2022 inkar, Brazil President a nih chhunga official gift a dawn zawng zawng pawh enfiah vek turin court chuan thupek a tichhuak bawk.

Brazil ram dan hnuai­ah, official-te hi thilpek an dawn zinga mimal thil bik tak tak chauh leh, a man hlu lote chauh chu an tana an kawl zui phalsak a nih thu court president Bruno Dantas chuan a sawi.

President inthlana a chak loh hnuah, Bolso­naro hi US-ah koin a la khawsa zui mek a, mahse an ramah hian kir a tum hnai nia sawi a ni. Hei vang hian President a nih laia Saudi Arabia sorkar hnena aṭanga tlereuh man to tak a dawn leh, heng tlereuh-te dan kalha an rama a lakluh chungchangte chu chanchinbu lamah an rawn vawrh thar leh a ni.

Brazil ram lut turte hian bungrua, USD 1,000 aia man tam chin an luhpui chuan an in report a, import tax an chawi a ngai ṭhin a ni. Mahse Bolsonaro hian President a nih lai, kum 2021 October thla khan Saudi Arabia-a official trip a neih hnuah a energy minister nen lunghlu an hawn niin an tarlang. An lunghlu hawn hi USD mtd 3.2 leh USD 75,000 man nia sawi niin, official gift anga an lantir avangin chhiah an chawi lo nia sawi a ni bawk. Mahse official gift a nih chuan heng thilpek te hi presidential palace collection-ah dah tur a ni thung.