Russia Parliament, Kremlin chuan an ram president Vladimir Putin-a sawmna angin kar leh hian China president Xi Jinping chuan Russia a tlawh dawn tih nimin khan a sawi. 
President Xi hi ni hnih cham turin Thawhṭanni hian Russia-ah hian a kal dawn a, Putin nen meeting neiin ram pahnihte thawhdunna ṭha zawk siam dan turte an sawi dan a ni. A cham chhung hian thawhdunna tur inremnate pawh an ziakfel nghal dawn niin Kremlin chuan a tarlang bawk. 
Xi hian kum 2019 khan Russia hi a lo tlawh tawh a, nikum February thlaa Russia-in Ukraine run hma lawk khan Putin chu Beijing-a Winter Olympic hawnna inkhawm hmangin China ramah hian a lo zin ve tawh bawk. Ram pahnihte hian an thawhdunna hi tinghet chho zelin, an insumdawn tawnna pawh a lian tawh hle a, China hi Russia oil leitu ram lian ber a ni tawh bawk a ni. 
Russia-in Ukraine ram a run chungchang khawthlang ramten Russia dem a, hrekna hrang hrang an siam hnuah pawh China hi hun rei tak a ngawi a, Russia lam thlawpa puhin sawisel pawh a tawh phah fo a ni. Mahse thla liam ta khan China hian 12-point paper tichhuakin, ram hrang hrangte an ram china thu an neihna inzahtawnsak a ṭul thu sawiin, Russia leh Ukraine pawh inbiakna nei turin a ngen a ni. 
US media-te chuan President Xi hian Russia a tlawh hnuah, Ukraine president Volodymyr Zelenskyy chu virtual hmangin meeting a neihpui leh dawn niin an tarlang a, mahse hemi chungchang hi China lam chuan an la sawichiang lo.