Turkey-a lirnghinna bialah tuilian vangin harsatna tawk
Turkey rama tun hnaia lirnghing vanga chhiatna rapthlak tak tuarte zinga province pahnih, Sanliurfa leh Adiyaman province-ah ruahsur nasa vanga tuilianah mi 13 an thi a, mi sang tel chenna in nei loin an awm phah bawk.
Turkish media-te chuan Nilaini aṭang khan Syria hmarlam ramri bulahte tuilian hian chhiatna a thlen thu an sawi. Lirnghing vanga harsatna tawk, camp-a la khawsa mek eng emaw zat pawh sawnchhuah an ni bawk tih ofiical-te chuan an sawi.
Police leh rescue team-te chuan harsatna tawkte chhanchhuah hna hi an thawk a,chhanchhuah hna thawktu zinga pahnih chu an chin hriat lohin an awmtih Sanliurfa governor Salih Ayhan chuan a sawi a ni.
Tuilian hian car leh hnawmhnawk tam tak hnawlin, inte pawh a chim nasa hle. Mi eng emaw zat chu an in tuiin a chim avangin an tang mek a, heng mite hi diver leh lawng hmangin chhanchhuah hna thawk mek a ni tih disaster management authority chuan a tarlang.
Province pahnihnah hian darkar 24 chhungin ruah hi 100 millimetres per square metre aia tamin a sur nia sawi a ni. Heng province pahnihte hi thla liam taa lirnghing na takin chhiatna rapthlak tak a thlen tuar nasa zingah an tel. Lirnghing vang hian Turkey ramah mi 48,000 chuang an thi a, mi maktaduai tel chu chenna nei loin an awm phah bawk a ni.