NKorea-in missile kapchhuak leh

South Korea leh Japan ram hruaitute summit nei tura an inbuatsaih mek karah, North Korea chuan Ningani khan Korean peninsula leh Japan inkara tuipuiah missile a kapchhuak leh.

SKorea leh US-in joint military drill an ṭan hnuah, tunkar chhungin NKorea hian nitin deuhthaw missile hi a kapchhuak tawh a ni.

Ningani khan SKorea president Yoon Suk Yeol chuan Japan prime minister Fumio Kishida nena summit nei turin Tokyo a pan a, mahse an ram a chhuahsan hma lawkin NKorea hian missile hi a kapchhuak a ni.

SKorea joint chief of staff chuan Ningani-a NKorea missile kahchhuah hi eng ang nge tih an la hriatchian loh thu a sawi.

President Yoon hi kum 12 hnuah SKorea hruaitu zinga Japan prime minsiter nena meeting neih tura Japan ram tlawh hmasa ber a ni. Hruaitu pahnihte joint news conference an neihah, Japan PM Kishida chuan inlaichinna kawngah bung thar siam an duh thu te, inlaichinna nghet leh chak zawk siam a ṭul thute a sawi a ni. South Korea ram pawh a tlawh ve theih thuai a beisei thu a sawi bawk.