Suu Kyi-i'n inthlan a chuh tur a tichiang

Myanmar State Councellor Aung San Suu Kyi chuan November thlaa an ram inthlan­pui neih tur a chuh dawn tih nimin khan a tichiang ta. 

Sipai rorelna paihthlak a, mipui sorkar a din theihna tura beitu Suu Kyi hi a hnathawh avang hian khawvela chawi­mawina sang, Nobel Peace Prize pawh  hlan a lo ni tawh a ni. Kum 2016 inthlanpuiah khan a party, National League for Democracy (NLD) chuan hnehna changin sorkarna an siam a, mahse an ram danpuiin rorelnaah sipai tan chanvo eng emaw zat a hauhsak avangin, sorkar tharah pawh sipaite nen thuneihna  hi an insem a ngai a ni. 

Sipai rorelna hnuaia an ram danpui siamah ramdang mi nupui/pasala nei leh fa neite chu an ram President-ah dah theih an ni lo. Hei vang hian NLD hian hnehna chang mah se, Suu Kyi hi British mi pasal nei a, fapa pahnih a lo nei tawh avangin Myanmar President-ah dah theih a ni lo a, a chanpual tur hi a hrana siamin State Councellor-ah dah a ni ta a ni. 

Myanmar ram tana a beihna kawngah hming ṭha hle mah se, Rohingya Muslim-te chunga sipaite chet dan te, he thil thleng chungchangah aw a chhuah mai loh avangin Suu Kyi larna leh hmingṭhatna pawh hi a tlakhniam phah hle. 

Inthlanpui hi November 6 ah neih a ni dawn a, union parlia­ment in hnih bakah state/regional legislature-a seat 1,171 ah inthlan hi neih a ni ang. Political party 90 velin inthlan hi an chuh ang.