US-ah hri kai thar punna a tlahniam

Khawvela Covid-19 kai leh he hri vanga thi tamna ber ram, US-ah chuan kar li chhung a zawnin hri vanga thi punna hi a la san belh zel. Hetih lai hian hri kai hmuh thar punna erawh a tlahniam ṭan thung. 

Kar liam ta khan hripui vanga thi hi a kar hmasa aiin 36% in an tam zawk a, mahse hri kai hmuh thar erawh 5% in a tlahniam thung a ni. California, Florida leh Texas te chu hri kai thar tam zualna state an ni a, mahse heng state pathumah pawh hian hri kai thar punna hi a tlahniam ṭan.  

May thla hnua a ṭum khatna atan kar liam taa Covid-19 test neih zat pawh 6% in a hniam bawk tih The Covid Tracking Project data chuan a tarlang. President Donald Trump chuan ram lian dangte nena khaikhin chuan, Covid-19 dona kawngah US chuan a ti ṭha zawk hle tih a sawi. Mi maktaduai 60 chuang test an ni tawh tih sawiin, hetianga ti thei ram dang an la awm lo tih a sawi bawk. An hmalakna avangin hmasawnna pawh hmuh turin a awm chho a ni, a ti.