H1B visa neite chhawr khapna Thupek Trump-a'n a ziak

US president Donald Trump chuan federal agency-ten H-1B visa nei ram dang mi, contract leh sub-contract-a an chhawr ṭhin tihtawpna thupek chu Thawhṭanni khan a ziak. He ruahmanna hi US mi leh sate tam zawkin hna an hmuh theihna tura tih a ni. 

June 23 khan President Trump-a kaihhruai sorkar chuan H-1B visa bakah, ram dang mi hnathawka awm turte tana visa pek ṭhin chu kumin atan tihtawp a nih thu a lo sawi tawh bawk a, hei hi June 24 aṭang khan hman 

ṭan nghal a ni bawk. 

Heng visa tihtawp lailawk a nih chhan hi US-a Covid-19 hri leng vanga hna chan tam tak an awm vang a ni. America miten an rama hna thawh tur an hmuh theihna atan sorkar chuan he ruahmanna hi a siam a ni. "Vawiin ni hian executive order-ah ka hming ka sign a, America mi leh sate tan a ni. Ka hming ka sign chhan hi kan ram mi leh sate kan ramah ngei hna an hmuh theihna tur atana ti ka ni. H-1B hi mi talent leh thiamna sang neiten US-a hna an neih theih nana tih a ni a, mahse kan ramah mi thiam tak takte tan hna kan hawn sak a ngaih avangin H-1B visa chungchangah hian order kan tihchhuah a ngai ta a ni," tiin Trump chuan a cabinet room-a executive order a sign lai hian a sawi. 

H-1B visa hmang hian ramdang mi, thiamna bik neite chu US company hrang hrangah hna an thawk thei a ni. India mite chuan he H-1B visa hi an chhawr ber a, kum 2018 khan he visa nei zinga 73.9% chu India mi an ni. India-a IT, finance, accoun-ting, architecture, engineering, mathematic, science leh medicine lama mithiam tak tak chu he visa kaltlang hian US-ah hna an thawk ṭhin a ni.