China-in TikTok hralh phal lo

US, Washington-a hmunpui nei Microsoft Corporation-in TikTok lei an tum chu China chuan hralh an phal dawn lo tih China Daily newspaper (English-language) chuan a tarlang. 

China chanchinbuah hian US chuan TikTok neitu, ByteDance company chu a ngam zawng a nih avangin a zuam nia tarlan a ni a, an lei tum dana American mipuite ngaih pawimawh hleihluak tumna a awm avangten China chuan an lei tir phal a rinawm loh thu tarlan a ni bawk.   

Kar liam taa US president Donald Trump-a'n an rama TikTok khap a tum thu a sawi lai boruak a awm mek laiin, Microsoft Corporation chuan he video app hi lei tuma hma an lak thu an tarlang a, hei vang hian Trump pawhin Pathianni khan a siamtu China company, ByteDance hnenah an TikTok app siam chu Microsoft Corporation hnena an hralh theih nan ni 45 chhung hun pek a rem ti ta a ni. 

Thawhṭanni khan US president Donald Trump chuan American company, Microsoft Corporation-in ni 45 chhunga TikTok hi an lei hman lo a nih chuan September 15 aṭangin an rama khap a tum tur thu a sawi a, Thawhṭanni vek khan Microsoft chuan ByteDance nen indawrna an neih thu a tarlang zui ve bawk. ByteDance nen chuan an indawr tawh a, mahse eng angin kalpui zel a ni dawn erawh a la hriat loh.