Thailand PM-in Parliament ṭhiat May thlaah inthlanpui nei dawn

Thailand prime minister Prayut Chan-O-Chan chuan nimin khan an ram Parliament a ṭhiat a, May thlaah inthlanpui an nei dawn a ni.

Official Royal Gazette chuan Parliament ṭhiah a nih thu hi a puang a, hemi rual hian inthlanpui neih ni tur erawh chu Election Commission-in a la tichiang dawn a ni. May 7 emaw, May 14 emaw ah inthlan hi an neih rin a ni.

May thlaa inthlanpui neih tur hi kum 2014-a sipai chakna hmanga sorkar paihthlak a nih hnuah inthlan an neih leh ṭum hnihna tur a ni. Inthlan hun tur tihchian la ni lo mah se, unofficial campaign erawh kar eng emaw zat an kalpui tawh.

Kum 68 mi, PM Prayut hi sawisel hlawh tak, kum 2019 inthlanpuiah khan a chak a, mahse tun hnaiah a larna a tlahniam chak hle. Pathiannia mipuite ngaihdan lak an tarlanah, PM atana an mi duh zingah Prayut hi a pathumnaah a tla thla a ni. He poll hi National Institute of Development Administration buatsaih a ni a, ngaihdan an lakkhawm aṭanga a zahve, 50% dawn chuan PM atan United Thai Nation party mi, Pheu Thai an duh ber tih an sawi. A dawtah hian 38% hmutu, Paetongtarn awmin, Prayut duhtu hi 15% vel chauh an tling.

Kum 2017-a sipai siam constitution an hman mek hnuaiah, Election Commission-in inthlan result a tihchhuah fel hnuah, Parliament-ah prime minister tur hi an thlang chauh dawn a ni. PM thlang thei turte hi elected lower house MP 500 bakah, sipaiin a ruat vek senator 250-te an ni.