Imran Khan-a party dan pawna hnawl dan buaipui mek

Pakistan prime minister hlui, Imran Khan-a political party din, Pakistan Tehreek-e-Insaf (PTI) chu dan pawna hnawl a nih theih dan buaipui mek a ni.

Interior minister Rana Sanaullah chuan Lahore-a press conference a neihah hemi chungchang hi sawi chhuakin, rorellai Pakistan Muslim League-Nawaz (PML-N) legal team chuan PTI dinhmun hi an zirchiang mek tih a sawi a, hemi rual hian official-a political party dan pawna hnawlna tur tifel tur chuan hun a duh deuh dawn niin a sawi.

Inrinni liam ta khan Punjab police-te chuan Lahore-a Imran Khan chenna, Zaman Park an dap a, in chhungah hian silai an hmu niin Punjab inspector general of police (IGP) Dr Usman Anwar chuan a sawi. Hei bakah Zaman Park-ah hian bunker-te siam a ni a, bullet-proof equipment-te pawh hmuh a nih thu sawi bawk.

Nikuma vote of no-confi­dence hmanga Prime Minister a nihna aṭanga paihthlak a nih hnuah, Imran Khan hi thubuai eng emaw zat siamsak a ni tawh. A thubuai thar ber chu Pathian­ni khan siamsak leh niin, terrorism case siamsak a ni.

Islamabad High Court (IHC) chuan nimin khan PM hlui leh PTI chairman Imran Khan laka thubuai ziahluh zawng zawng chu a kimchanga thehlut turin thupek a tichhuak.