Putin-an Ukraine ram an luah Mariupol a tlawh

Russia president Vladimir Putin chuan puangzar lawk loin Ukraine ram an luahsak, Donetsk biala Mariupol khawpui chu Inrinni liam ta zan khan a tlawh.

Russia sipaite chuan Donetsk bial hi May thla aṭang khan an luah tawh a ni.

Putin hian helicopter-in Mariu­pol hi a pan a, district dangte pawh a enkual nghal nia sawi a ni. Russian state television chuan Putin-a'n khawpui chhunga cheng mi ṭhenkhatte a tlawh kual lai leh, deputy prime minister Marat Khusnullin-a'n khawpui siamṭhat hna thawh mek chungchang a hrilhfiah lai footage an tichhuak.

Mariupol a tlawh hma ni hian Putin chuan Ukraine aṭanga Black Sea peninsula an laksak kum kuana champha pualin Crimea a tlawh bawk a, Black Sea port city, Sevastopol pawh tlawhin Moscow-in governor atana a ruat, Mikhail Razvozhayev chuan a ṭawiawm.

Russia hian mipui ngaihdan a lak hmangin kum 2014 khan Ukraine rama Crimea ram hi a luah a, mahse referendum hi Ukraine leh ram dangten an pawmpui ve lo. Ukraine president Volodymyr Zelenskyy chuan Crimea aṭanga inlachhuak turin Russia hi a phut reng a ni.