France sorkarin Parliament-ah Fiahna a paltlang

France president Emmanuel Macron kaihhruai sorkar chuan an ram parliament, National Assembly-a sorkar rin tawk lohna motion putluh chu Thawhṭanni khan a paltlang.

National Assembly-a sorkar rin tawk lohna motion putluh hi MP 278 an thlawp a, mahse he motion hi tlang turin MP 287 ten an vote a ngai a, hei vang hian sorkar chu an paihthla zo ta lo a ni.

President Macron-a'n pension kum, kum hniha tipunga kum 64 china a bithliah chu duh loin, ram chhung hmun hrang hrangah mipuite'n lungawi lohna an lantir fo a ni. Nawrh huaihawtute hian pension reform bill hi President hian vote la loin a siam tawp nia sawiin, lungawi lohna an lantir chhunzawm zel dawn tih an sawi. Ningani hian ram pum huapin nawrhna lian tham tak neih leh an tum. Mahse eptuten sorkar an paihthlak zawh tak loh avangin, he bill hi Parliament-ah tlangin, 'law' ah chantir a ni thei dawn ta a ni.

Hetih lai hian eptute chuan he bill hi Constitutional Council-ah khin an tum tih an sawi. He bill hian ram danpui a kalh nia a ngaih chuan, Constitutional Council chuan a hnawlsak vek thei a ni.