Malawi-a thlipui tleh vangin mi 522 an thi

Malawi rama thlipui, cyclone Freddy tlehin chhiatna a thlena thi chu mi 522 an tling tawh a, mi nuai 5 velin harsatna an tawk mek a ni.

United Nations for the Coordination of Humanitarian Affairs (OCHA) chuan thlipui tleh leh ruahsurin chhiatna a thlen vang hian mi nuai 1.83 chu chenna hmun him lamah an insawnchhuah a ngai tih a sawi.

Ni ruk chhung ruah nasa taka a sur bawk avangin Malawi chhim lamah infrastructure tam tak leh thlai chinna ramte a chhe nasa hle. Report a luh belh zel vangin thil tihchhiat leh thi zat pawh hi an la punchhoh a rinawm thu an sawi. President Lazarus Chakwera chuan chhiatna thlenna hmun hrang hrangte hi a tlawhkual tawh bawk.

UN World Food Programme (WFP) country director Paul Turbull chuan Malawi ram hian puih an mamawh hle tih sawiin, ram hrang hrangte chu chhawmdawlna pe turin a ngen. UNICEF chuan thlipui tleh vang hian naupang nuai 2.8 vel chu ṭanpui ngaiin an awm mek tih a sawi.

Thlipui tleh tuartute awmna tur hian sorkar chuan emergency shelter 300 chuang a siam a, police leh sipaite chuan ruang zawn hna an thawk chhunzawm mek bawk a ni.