Israel-in West Bank-a Israel mite chenna phalsakna dan tur pawm
Israel parliament, Knesset chuan Palestinian ram an luah, West Bank hmar lama Israel mite chen khapna dan siamṭhat chu Thawhṭanni zan khan a pawm. Dan siamṭhat hi pawm a nih tak avangin a hmaa West Bank-a hmun paliah hian Israel mite an awm phalsak an ni leh thei dawn a ni.
Dan siamṭhat chungchang hi sawiho a nih hnuah, Thawhṭanni zan tlai tawh takah khan vote lak a ni. Parliament 31-in an thlawp laiin, a thlawp lo lamah member 18 in an vote thung.
West Bank hmarlama hmun pali - Homesh, Sa-Nur, Kadim leh Ganim-a Juda-te chenna tur in sak chu dan kalh nia sawiin, heng hmuna chengte hi chhuahtir an lo ni tawh a ni. Mahse Israel sorkarin dan a siamṭhat leh avangin, he hmunah hian Israel mite chenna in hi sak a ni leh thei dawn a ni.
Israel-in Palestinian ram a luah, East Jerusalem leh West Bank-ah hian Israel mi nuai 6.5-7 vel an khawsa mek a, an awmna hmun tam zawk hi Palestinian private ramah sak an ni.
Prime minister Benjamin Netanyahu kaihhruai ṭangrual sorkar thar hian Israel ram luah hrang hrang, West Bank pawh huamin Israel mite chenna tur hmun siam belh zel chu a ngaih pawimawh hmasak tur a ni tih a lo puang tawh a ni.