IMF-in Sri Lanka khaichhuahna tur USD tld 2.9 loan pawm

Sri Lanka president Ranil Wickremesinghe chuan an ramin leiba ngah avanga sum lama harsatna an tawh mek lak aṭanga khaichhuahna tur, USD tld 2.9 loan pek tur chu International Monetary Fund (IMF) chuan a pawmsak ta tih a sawi.

IMF board hian loan pekna tur hian hming pawh an ziak fel tawh nia sawiin, pek chhuah a ni thuai dawn a, kum li chhungin he programme hmang hian Sri Lanka economy tlachhe tawh chu siamṭhat an tum dawn a ni. A tirah USD maktaduai 333 pek chhuah nghal a ni dawn tih IMF chuan a tarlang bawk.

Hetih lai hian, IMF mana­ging director Krista­lina Georgieva chuan Sri Lanka hian an ram dinhmun siamṭhatna turin a theih angin hma a lak chhunzawm zel a, chhiah lak dan siamṭhat leh, mi harsa zawkte tana ruahmanna siamte a chhunzawm a, an harsatna tawhna chhan zinga mi, eirukna hluar tak chu titawp tura an beih zel a ngai a ni, a ti.

Sri Lanka hian an ramin independence a hmuh hnuah sum lama an tlakchhiat ber hun an tawng mek. Nitin khawsakna atana mamawh, ei tur, fuel leh damdawi thlengin an mamawh zat pawh an lalut thei tawh lo a ni. Hetih lai hian an harsatna tawh mekah sorkar chu mawhphurtuah puhin lungawi lohna an lantir fo a, hei vang hian president hlui Gotabaya Rajapaksa pawh ram dangah tlanchhiain, July thla khan a ban phah tawh bawk a ni.

Rajapaksa a ban hnu­ah Wickremesinghe hi President-ah awmin, an ramin harsatna an tawh mek laka IMF puihna an dawn theihna turin hma a la chho a, sorkar sum hman­ral pawh nasa taka tihniam­in, chhiah lak pawh a tisang zui bawk.