US-in Myanmar sipaite hrekna a siam belh leh dawn
US chuan Myanmar sipaite hrekna a siam belh leh dawn a, hei hian sipai sorkarin ralthuam leina tura sum an lakluhna thlengin a nghawng dawn tih US state department counselor Derek Chollet chuan a sawi.
Jakarta-a nimina chanchin thar lakhawmtute a kawmnaah, Derek Chollet chuan Myanmar-a sipai sorkar chu na zawka nawr zel an tum thu sawiin, sum lakluhna lamah pawh an tan a harsat phah sawt dawn a ni, a ti.
Kum 2021, February 2 khan Myanmar sipaiten civil sorkar rorelna an hnehchhuh a, thuneihna an chan aṭang khan tualchhungah buaina a la chhuak zawm reng a ni. US leh khawthlang ram dangte chuan sipai sorkar hnuaia mi pawimawh, agency leh company dangte hrekna hrang hrangte an lo siam tawh a ni.
US hian Myanmar ramah mimal 80 leh pawl/company 30 chuang hrekna a siam tawh a, hengte hi an ram tualchhung buaina thleng mek tihtawp a nih theihna tura a hmalakna a ni tih Chollet chuan a sawi. Hemi rual hian Russia chu sipaite tana ralthuam leh hmanraw dang a supply ṭhinte titawp turin a phut nghal bawk.
Chollet chuan Association of Southeast Asian Nations (ASEAN) chu meeting a neihah, Myanmar sipai sorkar aiawh telh ngai lo turin a ngen a, "Sipaite chuan anmahni mipuite chungah ngei rawng taka an chet chhung chuan, an thiltih nghawng hi an tuar ngei dawn tih an hriatthiam a ngai a ni. Kan dahhran telh telh a ngai a ni," a ti. ASEAN hian high-level meeting-ah Myanmar sipai hotute tel hi a remti lo a, mahse member 10 awmna, regional block aṭang erawh chuan a la paihchhuak lo.