Palestinian tih hi kum 100 tling loa an hmuhchhuah chawp - Israel Minister

Israel finance minister Bezalel Smotrich chuan Palestinian chungchang a sawidan avangin sawisel a tawk zui leh nasa hle a, Palestinian-te chuan minister thusawi hian Israel-a far-right sorkar tharin chi inthliar a kalpui dan a tilang chiang hle a ni, an ti.

Paris-a thu a sawinaah Smotrich chuan, "Palestinian mi an awm lo a, chu vangin Palestinian tih hi a awm thei lo," tiin Palestinian mi tih chu kum 100 pawh la tling loa an hmuhchhuah chawp mai mai a ni, a ti. Hei hi kum 2021-a thi, Israel right-wing Likud party activist, Jacques Kupfer hriatrenga hun hmanaah a sawi a ni.

Israel-in Palestinian ram a luah, West Bank-a civil mite inrelbawlna chungchanga enpuitu, ultranationalist Smotrich hi Palestinian ram hran siam dodaltu langsar tak a ni a, Palestinian-te chungchanga ṭawngkam na tak tak, sawisel hlawh tak tak a chhakchhuak a ni. March 1 khan West Bank-a Palestinian khua, Huwara chu nuaibo vek a ngai a ni tia a sawi avangin ram dangte dem pawh a hlawh phah hle.

Israel leh Palestinian Authority (PA) aiawhten Pathiannia Sharm el-Sheikh, Egypt-ah vawiin aṭanga hman ṭan tur, Muslim thla serh Ramadan an hman chhunga boruak ṭha leh muanawm a awm theih dan ngaihtuaha inbiakna an neih hnuah, Israel Minister hian Palestinian-te tana thu huatthlalawm tak hi a rawn sawi chhuak a ni.