Putin man a nih chuan 'Indo puanna'-ah ngaih a ni ang : Russia ex-President

International Criminal Court (ICC) in Russia president Vladimir Putin manna thupek a tihchhuah hnuah, Putin hi ram dangten man an lo tum a nih chuan indo puanna angah Russia chuan a ngai dawn tih Russia president hlui, Dmitry Medvedev chuan a sawi.

Medvedev hi kum 2008-2012 inkar khan Russia President a ni a, tunah hian Security Council deputy chairman a ni mek. Nikum February thlaa Russia-in Ukraine a run hnuah, Medvedev hian ram dangte vauna thu a chhakchhuak fo a, nuclear ralthuam hmanah pawh a vau fo a ni.

Kar liam ta khan The Hague-a ICC chuan Russia hruaitu Putin chu tihluihna hmanga Ukraine mi, naupang eng emaw zat tiamin Russia ramah tihluihna hmanga thawnah a puh a, manna tur thupek a tichhuak a ni. ICC thuchhuah chungchang hi sawi chhuakin, Putin man chu thil thleng thei lo tura ngaih a ni a, mahse a lo thleng palh hlauh a nih chuan a mantu ram chu Russia-in a bei nghal ang, a ti. "Entirnan, nuclear state hotu hi Gremany-ah lo man palh ni ta se, eng nge thleng ang? Russian Federation lakah indo an puang tihna a ni. Kan ralthuam neih hrang hrang, rocket leh a dangte chu Germany Chancellor office leh hmun dangah an thlawk phei nghal dawn a ni," a ti.

Russia chuan President Putin manna thupek tihchhuah a nih hnuah, ICC prosecutor Karim Khan leh ICC judge dangte chu an thutlukna siam chu dan kalh a ni tiin, an lakah criminal investigation a kalpui zui ve nghal bawk.