Israel dan siamṭhat hnuaiah Prime Minister paihthlak a har sawt dawn

Israel Parliament, Knesset chuan an ram prime minister ṭanglai ban/paihthlak theih dan tur chungchangah dan siam ṭhain he dan hnuaiah hian PM hi paihthlak a har phah sawt dawn a ni.

Nimina Knesset-a vote an lakah, bill hi member 61 in an thlawp a, member 47 in an thlawp lo thung. He dan thar hnuaiah hian prime minister chu Knesset emaw, cabinet minister emaw zinga hmun lia ṭhena hmun thumin, taksa lam leh rilru lamah a dinhmun chelh chhunzawm thei lo nia an ngaih chauhin PM anihna aṭangin ban/paihthlak theih a ni chauh ang.

Eptu pawl leh sawiseltu lam chuan he dan siam thar hi eiruk thubuai eng emaw zat nei lai, prime minister Benjamin Netanyahu hum theihna tura ruahman niin an puh. Netanyahu hian eirua an puhna hrang hrang hi thu dik lo niin a sawi thung.

Hetih lai hian Israel sorkarin judiciary system siamṭhat tum a, Supreme Court thuneihna tihnepsak a tumna duh loin ram chhunga lungawi lohna lantir chhunzawm zel a la ni. Nimin khan khawpui hrang hrangah nawrh huaihawt leh a ni.