Pension kum tihpun tum duh loin France-ah nawrh chhunzawm

France president Emmanuel Macron-a'n pension kum zat tihpun tumna chu kalpui chhunzawm zel a tum tih a sawi hnuah, nimin khan an ram khawpui Paris bakah ram chhung hmun hrang hrangah mipuiten lungawi lohna an lantir leh.

President Macron chuan pension kum hi kum hniha tipungin, kum 64-ah bithliah a tum a, eptu party leh labour union hrang hrangte chuan duh loin, vawi tam tak nawrh an lo huaihawt tawh a ni. Eptute chuan Parliament-a sorkar rin tawk lohna motion pawh an putluh phah a, mahse a tlang zo lo.

Ram chhung hmun hrang hrangah ni eng emaw zat Pension reforms duh loa nawrh huai­hawt a ni tawh chungin, President Macron chuan Nilaini khan hei hi an ramin a mamawh a, kum tin kum tawp lamah chuan hman theih ngei tum a nih thu a sawi nawn leh. Bill hi Constitutional Council-in a ennawn ve leh hunah 'law' a chantir a ni ang.

President thusawi hian mipui a ti tithinur hle a, hei vang hian nawrh hi an huaihawt leh a ni. Nawrh huaihawt hian rel service leh air service-te a tibuai a, school ṭhenkhat pawh khar a ni bawk. France rama trade union lian ber, CFDT hruaitu Laurent berger chuan sorkar chu pension reform hi sut leh turin an phut tih a sawi.