France rama Nawrh huaihawt zinga mi 457 man

France president Emmanuel Macron-a'n an rama sorkar hnathawk pension kum, kum 64-a tihpun a tum duh loha Ningania ram chhung hmun hrang hrangah nawrh huaihawtnaa buaina chhuakah police 441 an hliam a, nawrh huaihawt zinga mi 457 man an ni bawk.

Interior minister Gerald Darmanin chuan Pension Reform duh loha January thla aṭanga nawrh huaihawt tawhnaah Ningani kha buaina a chhuah nasat ber ṭum a nih thu sawiin, Paris khawpui bikah pawh kawtthlerah hmun 903-ah nawrh huaihawtute hian thil an hal tih a sawi. Hmun tam takah tharum thawhna a thleng a, hemi kara mipuite himna tura hna thawktu police-te inpekna chu fakawm a tih thu a sawi nghal bawk.

Nawrh huaihawttuten kar liam taa Parliament-a pawm tawh, Pension Reform sut tura an nawrna chu hnawlin, minister Darmanin chuan, "Tharum thawhna avang hian he dan hi kan hnuhdawh a ṭulna chhan ka hre lo. A ṭul takzet a nih chuan democracy kalphung ang takin sawiho tur zawk a ni a, tharum hmanga tihfel tur a ni lo," a ti.

Nawrh huaihawttu, General Confederation of Labor (CGT) hruaitute chuan mipuite chu tharum thawhna thlen lo turin chah mah se, pungkhawm tam tak chuan hruaitute thusawi hi ngai pawimawh loin pawi an khawih zui tho a ni. Hemi rual hian buaina chhuak chungchangah mawhphurtu ber chu sorkar a nih thu an sawi. Ningani khan khawpui hrang hranga nawrh huaihawtte hi maktaduai 3.5 an tling niin CGT chuan a sawi a, mahse sorkar chuan maktaduai 1 vel niin a sawi thung.