Imran Khan-a'n police hotuten thah tumin an phiarru tih a sawi

Pakistan prime minister hlui, Pakistan Tehreek-e-Insaf (PTI) hotu Imran Khan chuan Punjab leh Islamabad-a police hotute leh an ṭhuihruaite chuan thah tumin an phiarru niin a sawi.

Lahor-a a chenna, Zaman Park-a thu a sawinaah, Imran Khan chuan, "Punjab leh Islamabad police hotute hian min thah dan tur ruahmanna an siam a ni. Squad pahnih siamin PTI mi leh sate zingah awmin police lamah silai hmehpuaha buaina chawh chhuah tir an tum a ni.

Police lam hian na taka chhang letin, ka in chhung ngeiah min rawn luhchilha min kahhlum an tum a ni," a ti.

PTI hotu hian a party mi leh state chu police-te tithinrim tur zawnga che lo turin a chah nghal a, "Police-te chuan eng thilah pawh min hmu duh anih chuan, lo dang buai loin min rawn hmuhtir ang che u," tiin a chah. Police-ten man a, jail-a hruai an tum a nih pawhin ṭha tak a kal mai tur thu leh, a party worker-te laka thil ṭha lo a thlen a duh loh thu a sawi. Pakistan sorkarin amah tihchhiat leh thah tuma a ruahmanna chu a hlawhchham avangin, kawng dangin hma an la chho leh mek tih a sawi bawk.

Imran Khan chuan thah a lo nih pawhin sorkarin a awpbehna laka talchhuah tuma bei let zel turin ṭhalaite chu a chah a, "Sorkar hian engmah ti ngam lo leh, an dik lohnate pawh sawichhuak ngam lo tura mi hrekbeh a tum a, mahse a tawp thlengin ṭang ang cheu," a ti.