Judicial system thlak tumna tawpsan rih turin Israel Defence Minister-in ngen

Israel defence minister Yoav Gallant chuan prime minister Benjamin Netanyahu hnenah, a kaihhruai sorkarin judicial system thlak tuma a kalpui mek chu titawp rih turin a ngen.

PM Netanyahu kaihhruai right-wing sorkarin an ram judicial system thlak a tum avang hian hun rei tak chhung chu mipuiten lungawi lohna an lantir tawh a, a bikin kartawp apiangin khawpui hrang hrangah nawrh huaihawt liantham tak an nei ziah a ni.

Kar liam ta Inrinni khan Tel Aviv khawpuia mi tam takin judicial system thlak tumna duh lohna lantirin rally an huaihawt leh a, mi nuai hnih vel an tel niin tualchhung media-te chuan an sawi.

Sorkarin judicial system siamṭhat a tumah hian Supreme Court thuneihna tihnep sak a ni dawn a, court thutlukna lo siam tawhte chu Parliament-ah majority hmangin hnawlsak theih a ni dawn a ni.

Gallant chuan mipuiten lungawi lohna an lantir chhunzawm zel avangin khawtlang nun a tibuai a, an ram security dinhmun thlengin a tihderthawn phah a hlauthawnawm thu a sawi. Hei vang hian Inrinni liam taa TV-a thu a sawiah he system thlak tura hmalak mekna chu chawlhsan rih turin PM hi a ngen a ni. a

Minister chuan ṭangrual sorkar chu hma a lak chhunzawm leh hmaa eptu lamte inbiakna neiphui tur leh, April 5-a ṭan tur, Jewish Passover holiday hma chu hma la tawh rih lo turin a duh tih a sawi. Gallant chuan tun hma lama an la hriat ngai loh, Israel defence force lamah pawh lungawi lohna a awm chho niin a sawi. Israel reservist tam tak chuan voluntary duty aṭanga inhnuhdawhah an vau tawh a ni tiin, hei hian an ram venhimna lamah nghawng ṭha lo tak a neih phah a hlauhthawnawm thu a sawi.

Hetih lai hian, PM Netanyahu chuan court thuneihna sang lutuk siamṭhat tumna chu inthlan hnuhnung bera mipuite'n an vote tlinna chhan niin a sawi ve thung.

Defence Minister thusawi hi eptu hruaitu, Yair Lapid chuan ṭha a tih thu sawiin, minister chu a huaisenna avangin a fak hle tih a sawi. Mahse far-right police minister Itamar Ben-Gvir chuan Gallant chu na taka sawisel nghalin, PM hnenah a defence minister chuan eptu lam nawrna a nep zo lo nia sawiin ban nghal turin a phut.

PM pawhin Gallant hi ban mai a tum nia sawi a ni a, amah thlaktu tur hian agriculture minister ni lai Avid Dichter, Shin Bet hotu hlui chu dah a tum nia sawi a ni.