US-a Mississippi-ah thlipui tleh vangin emergency puang
US-a Mississippi state-ah thlipui tlehin chhiatna nasa tak thlenin mi 25 an thi tawh a, Alabama-ah mi pakhat a thi bawk.
US President Joe Biden chuan Mississippi-ah emergency puangin, chhiatna tawkte chhanchhuah leh chhawmdawlna kawngah state sorkar chu pui turin thupek a tichhuak tawh bawk. Chhawmdawlna sumte hi Carroll, Humphreys, Monroe leh Sharkey-a thlipui tuarte hnenah pek a ni dawn tih White House thuchhuah chuan a tarlang.
Kar liam ta Zirtawpni zan leh Inrinni zinga thlipui na tak tleh hian Mississippi leh Alabama hi a nuai a, in tam tak a chhiat bakah, thingkungte pawh a tlu nasa hle. Mississippi official-te chuan thlipui tuartute awmna tur emergency shelter pathum an siam a, nimin khan federal emergency management agency director Deanne Criswall chuan chhiatna thlenna hmun hi a tlawh bawk.
Thlipui tleh vang hian Mississippi, Alabama leh Tennessee-ah mi 26,000 vel chu power supply nei loin an awm a ni.