Bangladesh-in March 25 World Genocide Day-ah puang turin UN ngen

Bangladesh deputy high commissioner Andalib Elias chuan Inrinni liam ta khan March 25 chu World Genocide Day-ah puang turin UN hnenah ngenna an thlen tih a sawi.

Elias chuan, "Kum 2017 aṭang khan, Bangladesh ramah chuan genocide (hnam/ram mipui suatna) day angin kan lo serh tawh a ni. UN hnen aṭangin thil pahnih kan ngiat, chungte chu World Genocide Day-a min puansak tur leh, kum 1971-a Bangladesh rama thil thleng chu genocide anga min pawmsak turin kan dil a ni," a ti.

December 16, 1971 khan, Pakis­tan sipaite chuan India-Bangladesh force zawm turin an inpe a, Sheikh Mujibur Rehman kaihhruaina hnuaiah Bangladesh chu ram thar angin a piang zui a ni. "March 25, 1971 khan Pakistan sipaite chuan zan reh lai takin, mipui an tawng beih chiam a, hetah hian mi 1000 chuang an thih bakah, a hnu thla kua chhungin Bangladesh mipui maktaduai 9 an suat zui bawk a ni," tiiin ṭum khata mi tawngpawng thahna rapthlak ber zinga mi a ni tiin Elias chuan a sawi.

Hetih lai hian International Forum for Secular Bangladesh (IFSB) Switzerland chapter chuan Inrinni vek khan, Geneva, UN building-a Broken Chair square kawtah kum 1971-a Pakistan sipaite pawikhawihna chu genocide anga pawmsak tura phutin an pungkhawm ve bawk a ni.

Kum 2017 aṭangin Bangladesh chuan March 25, 1971 zana Pakis­tan sipaiten Dhaka-ah Bengali nationalist movement tichimit tura 'Operation Searchlight' kalpui a, an ram mipui pawisawi lote chunga an chetdan avangin 'Genocide Day' hi an lo hmang ṭan tawh a ni.