Israel PM-in judicial sytem thlak tura hmalakna Chawlh lailawk tur puang

Israel prime minister Benjamin Netanyahu chuan a kaihhruai right-wing sorkarin judicial system thlak tuma hma a lak mekna chu chawlhsan lailawk a ni dawn tih Thawh­ṭanni zan khan a puang.

Right-wing sorkar tharin judicial system thlak a, court thuneihna tihnep leh, judiciary lama Parliament member-te thuneihna sang zawk pek a tumna duh loin, hun rei tak chhung Israel khawpui hrang hrangah lungawi lohna lantir a lo ni tawh a ni. Prime Minister-in judicial system chungchanga sorkar hmalakna sawiseltu, a defence minister hlui Yoav Gallant a ban hnuah mipuite an thinur zual a, kawngpuite dangin nawrhna liantham tak an buatsaih chhunzawm bawk. Hun rei tak mipuiten nawrh a huaihawt vang hian President Isaac Herzog pawhin sorkar chu a hmalakna hi chawlhsak rih turin a lo ngen tawh bawk.

President Herzog-a'n a ngen hnuah, PM Netan­yahu chuan Thawh­ṭanni zan khan civil war chhuak thei tur danna atan leh, eptu lam nena inbiakna an neih theihna turin judicial sytem thlak tumna chu an chawlh rih tur thu hi a puang zui ta a ni.

Hetih lai hian, mipuite chuan sorkarin judicial system thlak a tumna chu a sut vek hma chuan nawr zui zel an tum tih an sawi thung.

Prime minister Netanyahu-a hmalakna duh lotu zingah hian a party, Likud party member ṭhenkhat leh military reserves lam an tel a ni.