Ukraine-in Leopard leh Challenger battle tank a dawng

Ukraine chuan an ram khawchhak lama Russia sipaite nena an inbeih meknaah, an sipaite thuam chakna turin Germany leh Britain aṭangin Leopard leh Challenger battle tank a dawng ta.

Kumin kumtir lam khan Leopard leh Challenger tank-te hi Ukraine tana pek an lo tiam tawh a, Thawhṭanni khan an thawn thleng ta a ni.

German Chancellor Olaf Scholz chuan Leopard battle tank an thawn thu hi sawiin, defence minister Boris Pistorius chuan an intiam tawh angin tank 18 chu Ukraine thuneitute kutah a thleng tawh tih a sawi bawk.

Britain sorkar pawhin Challenger 2 tank hman dan zira an rama Ukraine sipai training neite pawhin training an zo tawh tih sawiin, indona hmuna kal turin Ukraine ramah an kir tawh tih a sawi. Britain hian Ukraine tan Challenger tank 14 a pek tur thu kumin January thla khan a sawi a, mahse a thawn hmain Ukraine sipaite chu he tank hman dan tur training hi a pe phawt a ni.