Taliban-te'n Education activist an man

Afghanistan-a rorellai, Taliban-te chuan hmeichhe naupangten lehkha an zir theihna tura hma la tu, activist Matiullah Wesa chu Thawhṭanni khan an man.

Kum 30 mi, Matiullah Wesa hian an ram chhunga naupang, hmeichhe naupangte pawh tel vekin zirna an dawn theihna tura hma lain Afghanistan ram chhung hmun hrang hrangah a zin kual ṭhin a, vauna pawh a tawk fo a ni. Afghanistan rama educa­tion activist lar ber pawl niin, kum 2021-a Taliban-ten thuneihna an chan hnua hmeichhia zirlaite school kal chhun­zawm an khapsak hnuah, hmeichhe naupangten zirna an chhun­zawm theihna tur hian a charity, PenPath hmang­in a campaign chho a ni.

PenPath-ah hian volun­teer 2,400 vel awmin, ram chhung hmun hrang hrang­ah naupangte lehkha zirna tur classroom-te siamin, zirtirtute an rawihsak a, zirlaibu leh an zirna atana mamawhte an sem ṭhin.

Thawhṭanni khan a twitter-ah PenPath-a hmeichhe volunteer-te thlalak dah chhuakin, "heng mite hian an fanuten zirna an dawn theihna tura an dikna chanvo neihte pe turin an dilsak a ni," tiin a ziak. Hemi hnu lawk hian man a ni zui ta a ni.

Hmeichhiate zirna chhunzawm a khapsak avanga Taliban sorkar sawiseltu, Prof Islamil Mashal chu February thla khan man a lo ni tawh bawk a, mahse March 5 khan an chhuah a ni. Chhuah a nih hnu hian sorkar sawiselna lam hawi thu sawi engmah a la nei leh lo.